Ka thian, ka batchmate tih mai maite hi Chief Minister ka atanga chhuakah chuan a level a hniam lutuk. CM chuan ram leh mipui tana tha turah chuan tupawh be thei tura ngaih a ni zawk a. Kan sorkar hruaitute hian sawi awm leh awmlohte hre ve tawh rawh se. Social media kaltlanga mipui au aw leh harsatna avanga rum ri hi hruaituten an bengkhawnin an hre tur a ni a, an ngaithla tur a ni. Hei hi democracy lungphum a ni, a ti bawk. 

Dr. Tanpuia chuan, MPWD ten kawng enkawl an nei tam tawhlo niin a lang a. Hmun hrang hranga kawngpui pawimawh chhe lutuk hi PWD minister mutthluk rei lutuk vang leh sorkar inthlahdah vang a ni. Mizoram laili kawng pawimawhber, ATL road chu MNF sorkarin a ngaihsak hle a, an blacktop chhuak vek hman a ni. He kawng siam tura ZPM sorkar ruahmanna hi chhim mipui leh Zoram mipuiin kan thlir reng a. Tun dinhmunah inhmakhuana hmuh tur a awm lova. Working season kan neih reiloh thin avangin tun atanga ruahmanna felfai lo neihlawk a hun tawh hle a ni. He kawng chhe lutuk avang hian chhim mipui leh Zoram mipui kan rum mek a ni tih hi he sorkar hian hre rawh se, a ti. 

MYC chairman lo ni tawh, Dr. Tanpuia chuan, State University hi kan thenawm state dangte pawhin an state capitalah an dah kherlo, chuvangin chhimlamah dah ni thei se, tih hi chhim mipuite aw a ni. Police hnalak fair ber anga an sawi pawh, sorkar hlaulo DGP Anil Shukla IPS in ruahmanna mumal tak a lo siam tawh vang a ni a. Chuti chung chuan Mizoram Police mannual bawkchhiain, mipa police laktur sanzawng chu 163 cms atangin 157cms ah an hruthniam a. Hmeichhiaah pawh tihhniam a ni. Hei hi kan minister te leh thil titheite duhsak zawng lak tumna a ni mai em? tiin kan zawt a ni, a ti. 

Kalphungthar sorkarah sorkar dan bawhchhiain CM car manto lei a ni a. Car var tur nisi, car dum an intihhmuh hle a ni. VVIP visit tur inbuatsaihna hautak berah PM in Aizawl a lo thleng lo te kha, Lengpui leh Aizawl kawng hi he sorkar hian a enkawl/venghim zolo em ni? CBI consent pek tawh, thla 6 lek liam hnua sut a nih leh tak chhan pawh hi, talbuai an hlauh vang em ni? tiin a zawt bawk. 

F. Aithanga, National Council Member, MNF Gen. Hqrs. chuan inkhawm hi a kaihruai a. He hunah hian MNF Gen. Hqrs Adviser ten Dampa bial by-election puala sum an thawhkhawm hlanna hun hman a ni a. Dampa bial by-election MNF official candidate, Dr. R. Lalthangliana, MNF Sr. Vice President nibawk hnen atangin report ngaihthlak a ni bawk.